Den Rido Op spillt nees Theater! Mir huelen d'Stéck "Dräi mol Liewen" vum Yasmina Reza no wat leider am Mäerz 2020 huet missten ofgesot an op onbestëmmten Zäit duerch d'Pandemie huet missten verréckelt ginn.

WÉINI? - 11., 12. an 13. Mäerz 2022 em 20:00 Auer
WOU? - am ale Kino zu Veianen (23 Grand-Rue, 9410 Veianen)

Entrée: 14 €
Reservatioun: +352 691 849 398

Mir freeën eis iech do duerfen ze begréissen!
Denkt och drun dass dëst Event ënnert den déi Zäit bestoenden sanitären Mesuren stattfannen wäert!

Beschreiwung vum Stéck:

„DRÄI MOL LIEWEN“ weist eis eent op eng klassesch Grondsituatioun reduzéiert Stéck fir véier Persounen.

Zwou Koppelen, d’Männer sinn Astrophysiker, d’Fraen Akademikerinnen, ënnerhalen sech iwwert galaktesch Halo’en (sinn déi Dénger ronn oder flaach), iwwert d’Makulatur vun enger dräijäreger Fuerschungsaarbecht, an diskutéieren parallel kontradiktoresch iwwert d’Erzéiung vun engem 6jäerege Bouf (däerf deen nach en hallwen Apel kréien, nodeems en owes d’Zänn gewäsch huet). Et entstinn ëmmer erëm Streidereien, an et kënnt zu verschiddene Koalitiounen a Konstellatiounen tëscht den zwou Koppelen, wat mer op der Bün an dräi verschiddene Versiounen (Originaltitel „Trois versions de la vie“) gewise kréien.

Pointéiert Dialoger voll mat béisem Witz, voller Aktioun an trotzdeem psychologesch déifgrënneg, weist dëst zäitloost an zugläich modernt Stéck de Konschtcharakter vum Theater, wiesselt permanent tëscht Eescht a Banalitéit.