Et spillen : Conny Braquet, Claude Faber, Luc Schumacher, Irène Zeimes
Regie : Joe Heintzen, Assistenz: Noemie Leer
Musek : Camille Nanquette
Texter : Roland Meyer

Entry: 20 EUR, Reservatioun: email: info@anciencinema.lu, message: Ancien Cinema FB Messanger, SMS 621227850

SOLD OUT

Dee Leschte mécht d’Luucht aus
Also elo emol ganz éierlech, kann ee bei all deene Katastrophen nach Kabaret maachen?
D’Welt geet virun eisen Aen d’ Baach an, an eis bleift de Mond opstoen: d’Klima hëtzt sech op, Corona setzt nach een drop, an der Ukrain gëtt geschoss, Bensinn a Mazout ginn alt méi deier an eng Wunneng ka geschwë keen sech méi leeschten. D’Regierung huet just nach d’Superwaljoer 23 am A an Italien ass net op der Weltmeeschterschaft.
An do wëlls de Kabaret maachen? Däerf een hautdesdaags iwwerhaapt nach Witzer rappen? An nach vill méi wichteg, däerf een iwwerhaapt nach iwwer déi Witzer laachen?
De Kabaret Sténkdéier beäntwert déi Froe mat engem klore Jo, well den Humor déi bescht a wierksaamst Medezin an dësen Zäiten ass a bleift.
 

FIRWAT KABARET STÉNKDÉIER?
Dat ass eng gutt Fro, mee se ass leider net sou séier beäntwert, wéi se gestallt ass.
De Skunk, oder wann ee wëll, de Mephitis mephitis, ass Famill mam Dachs, a gëtt bis zu 40 cm laang, wat jo näischt Besonnesches ass. Hien huet, also de Skunk, oder hat huet, also d’Sténkdéier, e wonnerschéine Pelz, deen nawell gär zu Pelzmäntel verschafft gëtt. Hien oder hat lieft virun allem an Nordamerika an ass a Südamerika ënner dem Numm Surilho bekannt.
Maja, dat ass jo alles schéin a gutt, mee als Numm fir e Kabaretsensembel?
Kucke mer emol weider, wat am Buch steet: “Verspritzt bei Gefahr ein ausserordentlich lange haftendes, widerlich riechendes Afterdrüsensekret.” Ma do komme mer der Saach scho méi no! Stellt Iech d’Situatioun esou vir: An der lëtzebuerger, postmoderner Konsum-, Kultur- a Fräizäitgesellschaft, laueren e puer zolitt Sténkdéieren op Geforen. Dës Gefore sinn an hierem Revéier och permanent immanent, an esou hunn eis Sténkdéieren hier Afterdrüsen bestänneg op Standby. Een Zock gëtt esou mat deem Sekret op all Gefor geschoss, ouni Matleed, an dës Gefore ginn doduerch fir all Mënsch, souguer am Däischteren, fir eng laang Zäit erkennbar…
Schumme sollen all déi sech, déi bei dësem Numm un eppes anescht geduecht haten!
De Kabaret Sténkdéier kuckt op eng Entwécklung vu ronn 30 Joer zeréck. Et ass deemols am Fong esou komm, wéi et huet misse kommen: Eng Kéier, spéit Owes beim Patt, ass beschloss ginn, Texter zesummen ze schreiwen. An et sollte Kabaretstexter sinn.
An no enge selleche Produktiounen, déi ëmmer nees vu ganz ënnerschiddleche Schrëftsteller a Kabaretiste gefiddert goufen, besteet de Kabaret Sténkdéier haut nach ëmmer. Nach besser: Am Joer 2019 huet sech souguer eng Ekipp fonnt, déi zanter hier weise wëll, dass de lëtzebuerger Kabaret nach lieft, an dass dësen haut och batter néideg ass, vläicht souguer nach méi wéi soss.
An der Saison 2021/22 ass déi lescht Produktioun mam Titel “Negativ” mat Succès iwwer d’Bün gaangen. D’Irène Zeimes, Conny Braquet, Luc Schumacher a Claude Faber hunn sech dobäi mat Texter vum Roland Meyer a Lidder vum Camile Nanquette iwwer Politik, Kultur a Gesellschaft ausgelooss. Wien dës, an all déi aner Produktioun verpasst huet, kann op der Internetsäit vum Kabaret Sténkdéier säi Virwëlz stoppen: www.stenkdeier.lu.
Elo ass et un der Zäit, fir nei Texter ze schreiwen an ze prouwen, fir am Hierscht 2022 en neie Programm kënnen ze presentéieren. Wien eis net bucht, ass selwer Schold! Kontakt E-Mail: stenkdeier@gmail.com